• ×

11:37 مساءً , السبت 20 أكتوبر 2018

د. أسامة جسار

عاجبنى .. حوار لم يحدث مع رئيس الوزراء فى طرقة القصر العينى

بقلم : د. أسامة جسار

 0  0  223
زيادة حجم الخط مسح إنقاص حجم الخط
- مين حضرتك
- مدرس الرعاية
- رعاية إيه ؟؟
- رعاية قسم خمسة طوارئ
- فين القسم ده ؟
- شايف حضرتك الناس اللى فارشة على الأرض هناك دى .. هو القسم اللى جنبهم
- و مالهم قاعدين كده
- دول أهل العيانين اللى جوه القسم بس العيانين كتير أوى و من كترهم فيه عيانين على الأرض .. أصل كلهم ناس غلابة أوى و منهم ناس جاية من الأقاليم
- و ليه جايين من بعيد كده ؟
- لأن مفيش مستشفيات بترضى تاخد الحالات الكبيرة غيرنا
- و ليه مفيش نظام و لا أمن !! و ليه مفيش سيطرة على الأعداد دى كلها !
- و الله السؤال ده أنا المفروض أسأله ؟؟ فين الأمن ؟ لوعرفت إبقى قوللى .. بس رغم غياب الأمن ده الدكاترة شغالين و مش فارق معاهم رغم البهدلة و التعديات اليومية
- طب ممكن نتفرج على الرعاية
- اتفضل .. دى الأجهزة و المونيتورز اللى جابها اولاد أبو شقرة
- و السراير بتاعتكم دى نضيفة أوى
- أيوة دى السراير اللى اتبرعولنا بيها طلبة سنابل
- و إيه دى ؟
- دى مكنة غسيل لمينا تمنها من ستاف التخدير
- و إيه ده ؟
- ده جهاز تنفس من جمعية أصدقاء القصر العينى
- و إيه ده ؟
- ده جهاز أيكو و سونار تبرع مشترك من جمعية روح و بعض الطلبة
- و إيه دول ؟
- دى مضخات محاليل تبرع بيها أستاذ تخدير
- و مين دول ؟؟
- دول التمريض بيشتغلوا من 8 الصبح إلى 8 بالليل و يسلموا زمايلهم بتوع شفت الليل بيدوا علاج و محاليل و يسحبوا عينات و يدونوا العلامات الحيوية و يحموا المريض و يغيروا له البامبرز و يعقموا الآلات و الأجهزة و مرتباتهم من 800 إلى 1200
- و مين دول ؟؟
- دول العمال , بيمسحوا الأرض و يوصلوا العيانين للأشعات و العمليات و يفرغوا البول و يودوا الغسيل و يجيبوه
- بيقبضوا كام ؟؟
- 280 جنيه فى الشهر
- و إزاى عايشين ؟؟
- د ....... أستاذ العظام بيدفع لهم شهرياً 300 جنيه لكل عامل و د .... أستاذ مساعد التخدير بيدفع 100 لكل عامل و لولا كده مكانوش قعدوا معانا

- هو كل حاجة كده بالتبرعات
- أحب أعرف سيادتك إن حتى قعدات التواليت اللى فى الحمام و السخانات و الحنفبات كلها تبرع
- و مين اللى هناك ده !!
- ده دكتور امتياز لبسناه بالطو عشان يفرح بنفسه و بنشغله مشاوير طول اليوم عشان فيه عجز فى التمريض و العمال .. مرتبه 180 جنيه
- و إيه الشئ دى ؟
- ده اسمه النائب سيادتك .. ده كائن بيقعد 3 سنين مايروحش و ماينامش و مايستحماش و مايعيدش و مايخدش أجازة ... بس ساعات بنسيبه يدخل التواليت ... تحب تتفرج عليه من قريب ؟؟
- لا بلاش
- أنا بقول كده برده #cpd

التعليقات ( 0 )

المقالات

جميع الأوقات بتوقيت جرينتش +2 ساعات. الوقت الآن هو 11:37 مساءً السبت 20 أكتوبر 2018.